Wednesday, November 9, 2016

ரசனை...

முகநூலில் வெளிநாட்டுக் குழந்தை ஒன்று
தூங்கிவிழுந்து கொண்டே
முகமெங்கும் ஐஸ்க்ரீமை
ஈஷிக்கொண்டு சாப்பிjடுவதை
ரசித்த  லட்சுமி
பட்டென்று தன் ஒன்றரை வயது
மகனின் முதுகில் வைத்தாள்
அடி ஒன்றை
பருப்பு சாதத்தை வாயில் போடாமல்
கன்னத்தில் அப்பிக் கொண்டிருந்ததால்…

கவனம்...

உன் வார்த்தைகள் என்ன
திருவிழாக்கூட்டமா?
பேசிக்கொண்டிருக்கும் போதே
தொலைகிறேன்!..
ஆனால்
நான் தொலையக் கூடாது
என்பதில் நீ மிகக் கவனமாகவே
இருக்கிறாய்
அளந்தே பேசுவதால்..

கொக்கின் நாஸ்டால்ஜிக்..

ஓடுமீனும் ஓடவில்லை
உறுமீனும் வரவில்லை
ஆனாலும் வாடி நிற்கிறது
கொக்கு
நீர் வறண்ட ஆற்றில்…

இடப்பெயர்ச்சி..

நகரத்தின் நடுவே இருக்கும்
அரசு பள்ளியை நோக்கி
குடிசை மாணவர்களும்
குடிசைப் பகுதியின்
ஓரத்தே ஓங்கி நிற்கும்
தனியார் பள்ளியை நோக்கி
நாகரீக மாணவர்களும்…